انا كحد بيحب النظام طول عمري ودايما بحب أني اشوف الدنيا perfectومرتبه ،ودايما بحب أني احتفظ بحاجتي سواء هدايا من حد عزيز عليا ، أو حاجه بتفكرني بمناسبه معينه أو تاريخ معينه أو رحله أو مكان أو حتي أني احتفظ بصور قديمه وأكون ألبومات أو أني احتفظ بكتبي وغيرها بقي من حاجات اللي بتكون مرتبطة عندي بتفاصيل معينه في الماضي بما أني حد شغوف بدرجه كبيره بالتفاصيل ،وطبعا مع مرور الزمن بلاقي ان الحاجات اللي عندي الغير مستخدمه واخده مساحات كبيره وهي في حد ذاتها محتاجه ترتيب اكبر من الحاجات اللي بتستخدمها بشكل يومي يعني load إضافي عليا وعلي وقتي.
فدايما بحس ان الترتيب والتنظيم لحاجتي بياخد وقت كتير اوي مني و مجهود كمان، وبعد كل المجهود ده كمان والوقت بعد فتره قليله بلاقي ان النظام اللي عملته اتلعبك ومحتاج يترتب تاني ، وده بيسبب ليا توتر وضغط لأني محتاجه اشوف حاجتي منظمه وفي نفس الوقت مش فاضيه أني ارتب وأخذ الوقت ده كل شويه والموضوع فضل معايا كده من وانا طفله علي الرغم ان اللي حواليا شايفين عكس كده وان انا over ، دايما كان عندي احساس داخلي ان في حلقه مفقوده عندي لو عرفتها هقدر أني احافظ علي النظام لأطول فتره ، لحد ما سمعت عن كتاب حد رشحه اسمه سحر الترتيب لماري كوندو ، قلت ياه اخيراً في كتاب مخصص لموضوع التنظيم أحسن من المعلومات اللي علي google من وجهه نظري بحس ان الكتب بتكون مرتبه المعلومة بطريقه مدرجه يسهل تطبيقها.
بما أني دايما باسعي أني اعرف اَي حاجه تساعدني أني ارتب وانظم حاجتي وأحافظ عليها منظمه ، سالت علي الكتاب طبعا في المكتبات وملقتوش ونسيت الموضوع خلاص، من فتره قريبه حد رشح الكتاب تاني وقد أيه هو عظيم، فقلت لا بقي ده أكيد دي أشاره ، فسالت عليه تاني في المكتبات وملقتوش للأسف برده ، لقيت app لجرير بس للأسف مبتوصلش غير للسعوديه ، معرفش ليه العنصريه دي هههه، بالصدفة البحتة لقيت حد بيبيعه عندي online وكأني لقيت كنز معرفش ليه يمكن عشان مش مكنتش لاقياه ، واخييرا حصلت علي الكتاب ولما بدأت اقرأه اكتشفت قد أيه هو فعلا كنز وعرفت أيه هي الحلقة المفقودة.
بكل بساطه لاقيته بيجاوب علي اغلب الاسئله اللي ممكن حد بيحب يكون منظم أو حتي اَي حد حتي نفسه يكون منظم بس مش عارف الكتاب هيعرفه ازاي انه يكون منظم بطريقه سهله وبسيطه، انا حكيت القصه دي كلها وأسفه علي الاطالة عشان اوصفلكم قد أيه الكتاب عظيم وأي حد يكون زيي بيحب النظام هيساعده جدا أو حتي حاسس انه مش منظم ونفسه يكون منظم بس مش عارف يبدأ منين الكتاب ده هيساعده جدااا، الكتاب اسمه سحر الترتيب وهو فعلا سحر.
وشكرااا، مع خالص حبي وامتناني لكم .
